ହାଟଡ଼ିହି ୦୧/୦୪: ନନ୍ଦିପଦା ଥାନା ଅଧୀନ ଶିବନାରାୟଣପୁର ଗ୍ରାମରେ ଗୋଟିଏ ପରେ ଗୋଟିଏ ମୁଣ୍ଡ ନେଉଛି ଗ୍ରୁପ ଋଣ । କିଛିଦିନ ଭିତରେ ଦୁଇଜଣ ଆତ୍ମହତ୍ୟା କରିଥିବା ବେଳେ ପୁଣି ଜଣେ ଆତ୍ମହତ୍ୟା ଉଦ୍ୟମ କରି ଡାକ୍ତରଖାନାରେ ଚିକିତ୍ସିତ ହେଉଛନ୍ତି ।
କେନ୍ଦୁଝର ଜିଲ୍ଲାର ହାଟଡିହି ବ୍ଲକ୍ର ଶିବନାରାୟଣପୁର ଗ୍ରାମ । ଗ୍ରାମର ଗିରିଧାରୀ ଦାସ ଜଣେ କ୍ଷୁଦ୍ର ଚାଷୀ ଥିବା ବେଳେ ପନିପରିବା ଚାଷ କରି ପରିବାର ପ୍ରତିପୋଷଣ କରିଥାନ୍ତି । ଚାଷ ପାଇଁ ତାଙ୍କ ପତ୍ନୀ କୁନ୍ତଳା ଦାସ ଗ୍ରୁପ୍ ଋଣ ଆଣି ସ୍ୱାମୀଙ୍କୁ ଦେଇଥାନ୍ତି । ଚାଷରୁ ଯାହା ଆୟ ହୁଏ ସେଥିରୁ ଋଣ ଟଙ୍କା ପରିଶୋଧ କରିଥାନ୍ତି । ମହିଳା ଜଣଙ୍କ ଦୁଇଟି ଗ୍ରୁପରୁ ୧ଲକ୍ଷ ୪୦ହଜାର ଟଙ୍କା ଋଣ ଆଣି ଚାଷବାସ କରିଥିଲେ । କିନ୍ତୁ ଚଳିତ ବର୍ଷ ପନିପରିବା ଦର ନରହିବାରୁ ଚାଷରେ ବହୁତ କ୍ଷତିର ସମ୍ମୁଖୀନ ହେଲେ । ଫଳରେ ଋଣ ଟଙ୍କା ପରିଶୋଧ କରିବାରେ ନାନା ସମସ୍ୟା ଦେଖା ଦେବାରୁ ସାହି ପଡିଶା ଲୋକଙ୍କ ଠାରୁ ଧାର କରଜ କରି ଋଣ ସୁଝୁଥିଲେ ।
ଗୋଟିଏ ପଟେ ସାହି ପଡିଶାଙ୍କ ପଇସା ସୁଝି ନଥିବା ବେଳେ ଗ୍ରୁପ ଋଣ ବାଲା ବାରମ୍ବାର ଘରକୁ ଅସି ତାଗିଦା କରିବାରୁ ସେ ମାନସିକ ଭାରସାମ୍ୟ ହରାଇ ଘରେ ଚାଷ ପାଇଁ ଥିବା କୀଟନାଶକ ପିଇ ଦେଇଥିଲେ । ପରିବାର ଲୋକେ ପ୍ରଥମେ ଆନନ୍ଦପୁର ଓ ପରେ କଟକବଡ଼ ମେଡିକାଲକୁ ସ୍ଥାନାନ୍ତର କରିଥିଲେ । ସେଠାରେ ତାଙ୍କର ମୃତ୍ୟୁ ଘଟିଛି । ସେହିପରି ଅନ୍ୟ ଜଣେ ବ୍ୟକ୍ତି ଗ୍ରୁପଋଣ ଟଙ୍କା ପରିଶୋଧ କରି ନପାରି ଗତକାଲି ଘରେ ଥିବା କୀଟ ନାଶକ ପିଇ ଦେଇଛନ୍ତି । ତାଙ୍କୁ ମଧ୍ୟ ପ୍ରଥମେ ଆନନ୍ଦପୁର ଓ ପରେ କଟକ ସ୍ଥାନାନ୍ତର କରାଯାଇଛି ।
